SHILLONG: Da·o dipet Meghalaya a·dok gimikni gita nigopatgenchimode a·doko tom·tomaenga aro President’s Rule-ko ra·gatna nangani katta dongja ine a·dokni Governor Satya Pal Malik parakataha.
Meghalaya a·doko niam retirangko rakkiani namjaenga ine dingtang dingtang dolrang matnangtokengani gimin a·doko president’s rule-ko ra·gatna nanggenma ine sing·on, “Badiaba somoirangode Meghalaya-o so·sojengjeng ong·anirangko nikna man·engoba a·dok gimikni gita nigopatgenchimode da·o dipet tom·tomaniko nikna man·enga aro pilak a·dokrangon gisepgrikode so·sojengjeng ong·anirang dongaia,” ine Malik aganaha.
Re·anggipa jao uni dolrangko chadrapgipani gimin sing·on, iandake chadrapaniara kragijani ong·a aro iani bidingo chadrapgipa manderangan aganchakna nanga ine Governor aganaha.
Re·anggipa jao, HNLC-ni gitcham dilgipako police-rangni so·otani ja·man, Governor-ko Guwahati-ona salange Shillong-ona re·bapilengmiting somoio, uni sipai aro official-rangko, ma·sina man·gijagipa manderang ro·ong gosoahachim ine nikna man·a.
HNLC bobil dolni gitcham dilgipako police-rangni so·otani ja·man Shillong songjinmao adita so·sojengjeng ong·anirangko nikna man·ahachim aro ia a·selni bidingo sorkari, judicial inquiry-ko dakchina ge·etahachim. Ia a·selni bidingo judicial inquiry-ko dakchina ge·etani ja·manoba dingtang dingtang dolrang, HNLC-ni gitcham dilgipako so·otanio jak donggipa police officer-rangko kam dontongatchina dabitokskaengachim.
Ia a·selni bidingo police officer-rangko kam dontongatchina dabienggipani bidingo sing·on, judicial inquiry dakengmiting somoiode manderang, inquiry report-na sengkuna nanga maina inquiry report-o pangchakesa sorkari nanga gita ja·kurangko de·gen ine Malik parakataha.
