SHILLONG: Garo Hills-o aro mongsongbate Tura jillani dingtang dingtang biaprango china neng·nikaniko namatna gita PHE department, Tura-ni dingtang dingtang gittimrango dam 10 reservoir ba chidikrangko rikdapna gita proposal-ko on·na tik ka·manaha ine Budbar salo, a·dokni PHE Minister Renikton Lyngdoh Tongkhar parakataha.
Iana skang, Congress dolni MLA Zenith Sangma, Tura jillao chiko chu·onga gita man·jaengani a·sel manderang neng·nikanirangko man·tokna nangengani gimin Assembly-ni Session-o sing·doangahachim indiba Tura jillao chirang chu·ongjaenga ine matnanganiko PHE Minister jegalatskaenba, Tura Phase I aro III-o chirangko komie watani somoirango, a·ran karirango aro Tura Phase II Water Supply Scheme-o chu·onga gita chirangko on·na man·jaengmiting somoirangosa chiko chu·onga gita man·jaenga ine parakatskaaha.
Indake ong·genchimoba, PHE Minister-ni agangipa kattarangko Zenith jegalatskaenba, Tura jillani pilak biaprangon chirang chu·ongjaenga aro iako a·dokni Chief Minister an·tangba ku·rachakaigen ine parakatskaaha.
Tura jillao chirangko sale on·enggipa manderang chirangko agre dam rakdugae palenga ineba Zenith, an·tangni suk ong·gijaniko parakataha.
Congress MLA-ni sing·anirangna aganchakaniko on·angskaengon, a·doko songdongenggipa manderang chu·onga gita chirangko man·china uni department nangnikenga aro iana uamang pilak nanga ja·kurangko de·anggen ine Tongkhar, ku·rachakaniko on·angaha.
“Tura jillani dingtang dingtang gittimrango dam 10 chidikrangko rikdapna PHE department, proposal-ko on·na tik ka·manaha. Iana PHE department, gong kror 14.37-ko hisapmanaha,” ine PHE Minister, Assembly-o parakataha.
