TURA: Tura jillako nitoatna ja·ku de·anio Tura jillani ning·o donggipa dam 107 gittimrangna dingtangmancha nitosusaataniko ong·atanggen ine kobor on·aha.
Iani bidingo West Garo Hills a·jani Deputy Commissioner Ram Singh, dingtang dingtang dolrang aro gittimni dilgiparang baksa tom·aniko ong·atangaha aro Tura jillako nitoatani bidingo chanchirimanirangko dakangaha.
Ia nitosusaatanio chegipa gittimna, gittim dal·a dal·jani kri gong lak 5-oni gong lak 10-ona kingking tangkako boksis dake on·gen ineba ia tom·anio tik ka·e donangaha.
Tura jillani ning·o donggipa gittimrangko nitoatna nangengani gimin chanchiangengon, jabolrangko name galchina, chi pipe-rangko nitoe rakkichina aro uandakgipa gipin cholrangko Deputy Commissioner, ku·pattiangaha.
Samtangtango donggipa chiring chibisik aro buring bolgrimrangko rongtal an·tale rakkina nangengani gimin aganangengon, chiring chibisikrango aro ramarango jabol galgipa manderangko photo ka·e mesokatgipa manderangnaba boksisko on·gen ine Deputy Commissioner parakataha.
