RESUBELPARA: Rongtal an·tale dongani namgnirangko gipatna aro songtang noktango rongtal an·tale dongchina manderangko didina gita Sombar salo, Swachhta Hi Seva 2021-ko North Garo Hills a·jani Mendipathar-o donggipa Multi Purpose Cooperative Society Hall-o a·bachengataha.
India a·songni jakgitelaniko man·aoni bilsi 75 gapaniko manienggipa ‘Azadi ka Amrit Mahotsav’-ni bak gita ia Swachhta Hi Seva-ko North Garo Hills a·jani Deputy Commissioner RP Marak a·bachengate on·angaha aro iani ja·man, ‘Satyagrah Se Swachhgrah Rath Yatra’-koba a·bachengate on·angaha.
Ia Swachhta Hi Seva program-ko ong·atani bidingo jolo songdongenggipa manderangna talataniko on·angengon, songtang noktango manderangko rongtal an·tale dongchina didianio manderangni bakrimaniko bariatna ia program-ko ong·atenga ine North Garo Hills a·jani Deputy Commissioner RP Marak parakataha.
Plastic jabolrangko galani bidingo talatangengon, plastic bag-rangni pal ba·ra ba solapat budurangoniko tarigipa jolonggarangko jakkalskachina gita Marak didiangaha.
Ia Swachhta Hi Seva-ko maniani bidingo talate on·angkuengon, ia program-ko India a·song gimikon September 15 tarikoni October 2 tarikona ong·atenga aro iani ning·o dingtang dingtang program-rangkoba ong·atenga ine Marak parakataha. North Garo Hills a·jaoba PHE department-ni gita dingtang dingtang rongtalatani program-rangko ong·atanggen ineba North Garo Hills a·jani Deputy Commissioner parakataha.
Ia program-ko ong·atanio dongpae jinmana aganprakanggipa gipin manderangara, North Garo Hills a·jani Additional Deputy Commissioner ZJ Sangma aro PHE-ni Executive Engineer AD Sangma ong·a.
