TURA: North Garo Hills a·jao aro mongsongbate Resubelpara-oni Mendipathar-ona dakanggipa rama jal·langrang namsrangjaengahani a·sel jolni manderang aro ramako re·ruraenggipa manderang neng·nikanirangko chagrongna nangtokengahani gimin ia rama jal·langrangko ta·raken tarichina gita Rongrong GHADC Constituency-ni MDC Rinaldo K Sangma, a·dokni Chief Minister Conrad K Sangma-na sedoataha.
Chief Minister-na sedoatgipa chittio Rongrong MDC-ni parakatani gitade, ia ramako tarina gita Badri Rai company-na on·manahachim indiba ia ramako matchotate on·ningjaengani a·sel ia ramako re·ruraenggipa manderang neng·nikanirangko man·tokna nangengahachim.
“Ia ramani metre gniprakon a·kolrara dakanikosa nikna man·engaha aro iani a·selan Resubelpara aro Mendipathar jolrango songdongenggipa manderang bang·a neng·nikanirangko chagrongna nangtokenga. Resu Dekachang-oni Berubari-ona dakanggipa rama jolgimikoba a·a cho·ani a·sel re·a doanio manderang neng·nikanirangko man·tokna nangenga aro bang·a somoion a·sel ong·anirangkoba nikna man·enga,” ine Rinaldo parakatenba, ia ramao donggipa bolni dolongrangkoba RCC dolong tarichina changni chang aganahachim indiba da·onan maming ja·ku de·anirang dongkujaenga ine parakataha.
Indake ong·engon, ia ramako re·ruraenggipa aro jolo songdongenggipa manderangni namgnina Damra-oni Berubari-ona dakanggipa ramako ta·raken matchotate on·china gita ia kamko jako ra·e ka·enggipa Badri Rai company-na ge·etaniko on·atskachina ine Rongrong MDC, a·dokni Chief Minister-ko didiataha.
