SHILLONG: Mongolbar salo, Union Social Justice & Empowerment Minister Dr Virendra Kumar, Shillong-ona re·bae Social Welfare department-ni official-rang aro be·enni gita cholgri ong·gipa manderangna kam ka·enggipa dingtang dingtang dolrang baksa tom·aniko ong·atangaha.
Ia tom·anio Dr Virendra Singh, jinmana aganprakengon, India a·songo be·enni gita cholgri ong·gipa manderangnaba BJP sorkari, dingtang dingtang cholrangko on·enga aro uandaken 2014 bilsini ja·man be·enni gita cholgri ong·gipa manderangna chang 10,000-mangna program-rangko ong·ate, be·enni gita cholgri ong·gipa sak kror 20-mangna baten gong kror 500-mangni dingtang dingtang dakchakani bosturangko on·na man·aha ine parakangaha.
India a·songo be·enni gita cholgri ong·gipa manderangnaba sorkari dingtang dingtang cholrangko on·na jotton ka·enga ine janapatengon, Prime Minister-ni ‘Sabka Saath Sabka Vikas’-o pangchake ia sorkari, be·enni gita cholgri ong·gipa manderangna dingtang dingtang scheme-rangko ra·gataha ine Dr Kumar parakataha.
Social Justice & Empowerment Ministry-ni batanggimin bilsisnina kamko ka·ani bidingo janapatengon, a·songo songdongenggipa ramram manderangna gitan be·enni gita cholgri ong·gipa manderangnaba ia ministry, dingtang dingtang scheme-rangko ra·gate janggi tangani gadangko nambatatna kam ka·enga ine Union Minister parakataha.
Adita salrangna skang, be·enni gita cholgri ong·gipa manderangna Tokyo songjinmao ong·atanggipa Paralympics 2020-o India a·songoni re·ange ge 19 medal-rangko chebaahani giminba ua be·enni gita cholgri ong·e kal·susagipa manderangko mittelpilangaha. Ia kal·susaanio India a·songni kal·susagiparang, ge 5 gold medal, ge 8 silver medal aro ge 6 bronze medal-rangko chebaahachim.
Pekatgipa samrangko jakkalanichi songsalna ong·sianiko ra·baani bidingo janapatengon, pekatgipa samrangko jakkalaniara samko jakkalgipa aro uni nokdangnasan ong·aigija songsalnaba ong·sianiko ra·baani gita ong·a ine Dr Kumar parakataha. Salgro salaram a·dokrango iandakgipa namgijagipa bewalrangko bon·atna gita Social Justice & Empowerment Ministry-ni on·enggipa scheme-rangchi dingtang dingtang NGO-rang baksa nangrime kamko ka·china ua dingtang dingtang a·dok sorkarirangko didiangaha.
Ia tom·anio bakko ra·anggipa gipin manderangara, North Eastern Council-ni Secretary K Moses Chalai, Meghalaya sorkarini Principal Secretary Sampath Kumar, Commissioner & Secretary MN Nampui, Social Welfare department-ni official-rang aro department-na kamko ka·enggipa dingtang dingtang dolni dilgiparang ong·a.
2014 bilsini ja·man be·enni gita cholgri ong·gipa kror 20-na baten sorkarini dakchakaniko man·aha
Date:
Share post:
