TURA: Adita salrangna skang, Hallidayganj bazar-o donggipa mobile phone dokkanoniko cha·ugipa manderangoni saksako West Garo Hills a·jani Police-rang, Bristibar walo Assam-oniko rim·na man·aha.
Koborko on·ani gitade, adita salrangna skang, ma·sina man·gijagipa manderang, Hallidayganj bazar-o donggipa mobile dokkan ge·sao napenba, ia dokkanni mobile phone-rang baksana gipin bosturangko aro tangkarangko cha·uangahachim.
Iani bidingo Hallidayganj police station-o FIR ka·ani ja·man police-rang, am·sandianirangko dakenba, Assam a·dokni South Salmara-o donggipa Shah Zamal Sheikh (35)-ko rim·na man·aha aro ia mandeoniko police-rang, ge 19 mobile phone-rangko man·aha ine u·iataha.
Indake ong·engon, ia mande baksa mobile phone-rangko cha·uenggipa gipin manderangkoba rim·na gita police-rang sandienga ine kobor on·aha.
Niam gri palenggipa manderangoniko skatang mobile phone-rangko brejachina gitaba police-rang manderangna mikrakataniko on·angaha.
