TURA: Re·anggipa Budbar walo, Shillong-ona re·angenggipa MTC bus garini Nongchram dolongoni ga·akone a·sel ong·anio sianggipa manderangoni sakgnini manggisiko Sukrobar pringo man·daptaiaha aro uandaken ia a·sel ong·anio sigiparang da·o gimik sakchet gapengaha.
Sukrobar pringo Meghalaya Police-ni state fire & rescue dolrang, bilakbegipa crane-rangchi chio ga·akongipa bus gariko saldoani ja·man, ia MTC bus garini gnigipa driver aro bus gario songreanggipa mande sakgipinni manggisiko ia a·sel ong·chakgipa biaponiko man·aha.
“Sukrobar pringo police-rang, a·sel ong·anio gimakuenggipa manderangko sandina a·bachengaha aro uandaken ia bus gariko saldoani ja·man ia bus garini gnigipa driver-ni manggisiko nikaha aro uni manggisiko pring 9:00 bajimango ra·ongkatna man·aha. Ia bus gario songreangenggipa sakgipin mandeni manggisikoba ja·mano pringni 11:45 bajimango ua biaponiko nikaha,” ine East Garo Hills a·jani Superintendent of Police (SP) Bruno A Sangma parakataha.
Ia bus garini a·sel ong·ani pringode bus gario songreanggiprangoni sak 21-kosan man·e sigiparangkoba sakdokkosan man·aiahachim indiba Sukrobar pringo mande sakgnini manggisiko man·dapahani gimin da·o gari a·sel ong·anio sigiparang gimik sakchet gapengaha.
Ia MTC bus garini gnigipa driver-ara bilsi 40 ong·gipa Dapborlang Wankhar ong·achim aro ua East Khasi Hills a·jani Mawryngkneng ning·o donggipa Mawlyngad-oni ong·achim. Sukrobar pringo man·gipa sakgipin mandeni manggisiara Williamnagar Chidekgre-oni bilsi 25 ong·gipa Larsen M Marak ong·skaachim ine ma·sina man·aha.
Budbar walo, Tura aro Williamnagar-oni Shillong-ona manderangko salangenggipa MTC bus gari, Rongjeng-oni km 10-mang chel·ao donggipa Nongchram dolongoni Ringdi chiringona ga·akonange a·sel ong·ahachim. Ia a·sel ong·anio garini driver baksana me·tra sakgni aro pante sakgittamba, an·tangtangni janggirangko gimaatna nangahachim.
Ia a·sel ong·anio bang·bea manderang saknaanirangko man·na nangtokaha aro uamangoni sak 15-kode da·o bilongbee saknaanirangko man·ahani gimin dingtang dingtang hospital-rango done sanna bananirangko on·engachim.
