SHILLONG: East Jaintia Hills aro West Khasi Hills-o bang·a coke factory-rangko niam gri chalai-engani bidingo chanchi-batengani jatchio ge·sana agre bang·bata niam grigipa factory-rangko chiptokaha chipkugija ge·sa dongeng-gipako Board kachario ra·anggen ine Meghalaya State Pollution Control Board aganaha.
Jaintia Hills-o niam grigipa unit-rangna chip-china aro talate on·china u·iataniko on·aha, indake ge·sanagre unit gimikkon chipako nikaha ine Pollution Control Board-oni official saksa u·iataha.
“Chiplugijagipa ge·sana niamo pangchake nang-chongmotgipa ja·kuko de·na chinga kachario kamko ka·enga,” official aganaha. Pollution Control Board, September jao nirokeaha aro Board da·o a·jolo dontonggija nirokanggen, ua agandapaha.
West Khasi Hills-o niam grigipa coke factory-rangni obostao Board-ni ukil uamangna u·iataniko on·aha aro da·o kacharirang kam ka·taigen, indake ru·utgijaan niam gri chalai-enggipa factory-rangna nangchongmotgipa ge·-etanirangko on·a Board ka·dongenga.
Meghalaya-ni East Jaintia Hills district-o ritchani ritcha songdonggiparang ua-mangni songsulo niam grigipa coke factory-rangni bang·roroani kosako chakatenga. Coke adita rongtalgija ong·an baksana namen carbon bang·gipa ong·a. Balwa dongjao koela ba toko ding·atenga, uan karkanao tarigipa mong-songgipa bostu ong·a, mongsongbate silko so·ani seng·a indake ua karkana-rang rongtalgija ong·ata.
Salgro-salaram a·doko niam grigipa coke factory-rangko porikka ka·china u·i-ma·sigipa committee-ko songako Meghalaya sorkari ru·utgija salo u·iataha aro jeba coke unit-rangni kosako sing·sandina sorkari somai donga aro sandina ka·dongataha.
