SHILLONG: Congress party, a·song gimikon bak ong·angtokengaha ine NPP national president, Conrad K. Sangma Mongolbaro aganaha.
“Congress party, national level mangmangon temporary ba dikdiksana songaigipa president-san dongaia. Bilsi gittam ja·man mangba saksa dilgipakon seokna bilsokjaengjok. Partyo dilgipaan dongjaode, party-ko sawa re·dilgen. Iani a·selan da·alo Congress party bilding bildang ong·angtokengjok” ine mijalo Mawphlang-ni Congress MDC Lamphrang Blah-ko party-ona rimchaksoani somoio Pa Sangma aganaha.
NPP national party ong·genma ine sing·anina aganchakengon, chinga mongsongbate a·dokni uandake a·jolni nanggipa kamrangna mikpakma nibatenga ine Pa Sangma aganaha.
“Ian chingni party-ni niksengani. NPP, ian North East-o pangchakgipa party ong·a. Ian party-ni bilakani ong·a,” NPP national president aganaha.
Gitcham Chief Minister, Dr. Mukul Sangma aro MPCC president, Vincent H. Pala mangni gisepo meligrikjaenga ingipani bidingo sing·anina aganchakengon, party-o neng·nikanirangko namatna gita Congress, Delhi-ona re·angna nangaia ine NPP national vice president, Prestone Tynsong aganaha.
“Mukul aro Pala-mangna ka·sachake nikatpila, maina uamangni neng·nikanirangko namatna gita party president-ko grongna mangmangan antisako sengataha,” Tynsong aganaha.
NPP-ni obostade indake ong·ja namen dingtanga, bebegita badiaba dilgiparangni gisepo maiba meligrikgijanirang dongode, National President-an joljolan nokrangona re·baigen, Tynsong aganaha.
“Neng·nikanirangko kontasani gisepo namataia. Ian national party-ni chinko mesoka, jeon chinga an·tangtangarin sason ka·enga,” NPP dilgipa aganaha.
