SHILLONG: Re·anggipa October-ni 4 tariko Shillong songjinmani National People’s Party (NPP) office gate sambao IED bomako donanganio jak donggipa mande saksako Meghalaya Police, Bristibar salo rim·na man·aha. Ia bomako man·ani ja·man Bomb Squad-ni sipairang kimite galna man·ahachim.
Ia bomako donanganio jak donggipa mande saksako rim·ani ja·man da·o gipinrangkoba rim·na sandiengaha ine kobor on·aha.
Iani bidingo Meghalaya a·dokni Chief Minister Conrad Sangma, kobor ra·timgiparangna u·iatengon, NPP office gate sambao boma donanggipa manderangoni saksako rim·na man·aha aro ua an·tangba iani bidingo ku·rachakaha ine parakataha.
Ia mandeko rim·ani ja·man, gipinrangkoba rim·na gita police-rang sing·sandienga ineba Chief Minister parakataha.
Iani bidingo talbatataniko on·na jechakangengon, NPP office sambao boma donanggiparangkosan ong·aigija adita salrangna skang boma gopretanio jak donggipa manderangkoba police-rang sandie man·aha ine Chief Minister parakataha.
NPP office sambao boma donanggipa mande saksako rim·e sing·sandianirangko dakengkua ine talatangengon, iano jak donggipa gipin manderangkoba attamchipak rim·naba gnang ine Chief Minister parakataha.
Meghalaya a·doko tom·tomaniko rakkina man·jaenga ine matnanganirangko jegalatengon, “Ian gisepo ong·gipa obostasan ong·aia indiba chinga iandakgipa obostarangko name nirikkienga,” ine Sangma parakataha.
A·doko so·sojengjeng ong·aniko ra·bana jotton ka·enggipa manderangko rim·na aro mikkangchi iandakgipa a·selrang ong·jana gita police department, kamrangko raken ka·enga ineba Chief Minister parakataha.
