SHILLONG: Mukul Sangma-ko Congress Legislature Party (CLP)-ni dilgipa ong·aoniko ra·galchina mitam MLA-rang dabienga ine agananiko Congress dolni Charles Pyngrope aro Ampareen Lyngdoh jegalatenba, Mukul Sangma-an CLP-ni dilgipa ong·angkugen ine parakataha.
Meghalaya a·doko Congress dolni ja·delbatsranggipa dilgiparangoni saksa Charles Pyngrope-ni aganani gitade, CLP-ko dilgipani biap bangbang ong·genchimosa gital dilgipako seokna nanggen indiba da·o dipet Mukul Sangma-an CLP-ko dilengkua.
“Opposition dolni dilgipa Mukul Sangma, Congress dolko wate gipin political dolrango napskana miksongenga ine da·o dipet chinga maming u·iataniko aro chinrangko man·soa dongkuja aro uan da·o dipet CLP-ni dilgipa ong·kuenga,” ine Pyngrope aganaha.
Da·o dipet CLP-ni dilgipa Mukul Sangma, Congress dolni gipin MLA-rangko an·tang baksa napchina aganenga ingipani bidingoba ua maming kobor man·soa dongkuja aro ia pilakan kobor setimgiparangni chanchichipe seanisan ong·aiakon ineba Pyngrope matnangataha.
“Kobor setimgiparangni kobor on·aniko chinga gimikkode bebera·na man·ja. CLP-ni dilgipa doltangko wate katenga ine matnanggipani bidingo chingna sakkiko nanga indiba da·o dipet chingni ma·siani gitade, ua doltangni MLA-rangko ku·cholsan ong·atnasa jotton ka·enga,” ine ua aganaha.
Apsan daken Congress dolni sakgipin MLA Ampareen Lyngdoh-ba, Mukul Sangma-ko CLP-ni dilgipa ong·aoniko ra·galna miksongenga ine agananiko raken jegalataha.
Sangma-ko ra·galna miksonganirang donggenchimode disciplinary committee-sa kamko ka·gen ineba Lyngdoh aganaha.
“Mukul Sangma, uni nokdang aro chinga pilakan Congress dolna kakketo kam ka·giparangsa ong·a aro ua doltangoni ong·katna nanggenchimode maiba nangchongmota a·selrang dongna nanga. Ua indita bilsirangna Congress baksa ong·ahani gimin doltangko wate katanide una altua kam ong·jawa,” ine Lyngdoh aganaha.