SHILLONG: Meghalaya a·doko COVID-19-ni giproroani komianga intalan manderang COVID-ni tikarangko su·na gisiko nangtokjaengaha ine sorkari official-rang parakatenba, an·tangtangko ia kenbegnigipa sabisoniko naljoke rakkina man·na gita chu·gimik tikarangko su·e ra·china didiataha.
Meghalaya sorkarini Joint Secretary aro National Health Mission-ni Director Ram Kumar-ni parakatani gitade, da·o a·doko songdongenggiparangoni lak 2-mangni gitade gnigipa tikako su·ani ong·engahachim indiba a·doko COVID giproroani komianga intalan manderang tikarangko su·e ra·na gisiko nangtokjaengahachim.
“Meghalaya a·doko gnigipa changna COVID giproroengmiting somoirango May jaoni July jarangonade bang·bata manderangan tikarangko su·e ra·tokahachim indiba August jani bon·anganichibara sabisini giproroani komianga intalan tikako su·aniba komiangaha. Skanggipa tikako kusi ong·e su·gimin manderangba da·o gnigipa tikakode su·e ra·tokkujaenga,” ine Kumar parakataha.
Meghalaya a·doko sak 1.5-oni lak 2-mangni gitade gnigipa tikako su·ani somoi ong·engahachim ine janapatengon, ia gnigipa tikarangko su·na man·na gita sorkari, dingtang dingtang district-rangna micro plan-rangko tarichina ge·etaniko on·atmanaha ine Joint Secretary parakataha.
“Gnigipa tikako su·e ra·genchimosa an·chingna naljokaniko on·batgen, uni gimin skanggipa tikako su·e ra·gimin manderang pilakkon anga gnigipa tikakoba su·e ra·echina mol·molatenga,” ine Kumar parakataha.
Health official-rangni parakatani gitade, da·o dipet Meghalaya a·doko COVID-ni skanggipa tikako gimik sak 10,95,389 aro gnigipa tikakoba gimik sak 5,99,876 manderangde su·e ra·tokmanahachim.
