TURA: Da·omitingo poraigipa chatro chatrirangni admission ra·ani somoio, Garo Hills-ni chatro chatrirangna NEHU Shillong, Tura Campus-o admission on·na gita bilsokjani gimin suk ong·gijaniko parakenba aro jegalenba Garo Hills-ni dingtang dingtang nangrimgimin NGO-rang aro Social activist-rang, “All Garo Hills Joint Action Committee” (AGHJAC)-ni bimango mijalo NEHU Tura Campus-o office picketing ka·angaha aro NEHU Shillong-o gitan, Tura Campus-oba apsan Department-rangko kulichina gitaba dabiangaha.
Sabisi sajinmani a·sel, gipin a·dokrangona re·angede admission-rangko ra·na gita cholrang dongjaengani gimin Garo Hills-ni chatro chatrirangna Zoology, Mathematics, History, Political Science aro Geography dakgipa dingtang dingtang department-rango academic session 2021-2022-na admission-rangko on·china gitaba AGHJAC dabiangaha.
Poraigipa chatro chatrirangni bang·baani kri university department ge·antion seat-rangko bang·batatna nanga aro NEHU Tura campus-o pilak department-rangan dongna nanga ine AGHJAC dabiangaha.
Mijalo All Garo Hills Joint Action Committee (AGHJAC)-ni office picketting ka·anio, AGHJAC-ni Adviser Roger Benny A. Sangma, Balkarin Ch. Marak, Convener, AGHJAC, Saljrang Tengrik R. Marak, President, Garo Students’ Union (Eastern Zone) Jagir M. Sangma, President, FAF (Northern Zone), Walseng N. Sangma, General Secretary, GSU, (Resubelpara Unit), Zikku Balgra N. Marak, President, GSU (CEC) H.Q. Tura, Ryan Ch. Marak Chairman, GSMC, Garobadha Unit, Kengkrong B. Sangma, Secretary, GSU (Chibinang Unit), Tengsan M. Marak, President, GSU, Western Zone North, Silbil N. Marak, Vice President, GSU Eastern Zone, Raj Mark Ch. Momin, Publicity Secretary, GSU, Western Zone North aro Vice President GSU CEC, Tura Frenky Marak mang bakko ra·angaha.
AGHJAC-ni delegation Roger Benny A Sangma adviser AGHJAC aro Balkarin Ch Marak mang, NEHU Tura Campus-ni Pro Vice Chancellor-ni jako memorandum-koba NEHU Shillong-ni vice Chancellor-na on·ataha.
A·dokni poraigipa chatro chatrirangni namgnina aro campus-ko namroro-silroroatna gita, bil gnanggipa PVC-chi Tura Campus-ko re·dilna nanga, iarang baksana infrastructure-ko dingtangatna nanga, staff-rangko regularize ka·na nanga, bangbanggipa post-o gapatna nanga, examination centre-ko donna nanga aroba saksa joltangni Guest Lecturer-o rakkina nanga, pilak contractual-o ka·atenggiparangko regularize ka·na nanga, Tura campus-o Deputy Registrar aro Assistant Registrar-ko rakkina nanga ine AGHJAC dabiaha.
Indake ong·engon, uamangni dabianirangko niatgen aro Diwali ja·mano Tura Campus-ona re·ange nirokegen ine Vice Chancellor, Shillong-oni phone-o ka·dongataniko aganataha. Unomitingo uamangni dabianirangko chu·sokatjaode sima ari gri office picketing ka·angaikugen ineba AGHJAC mikrakataha.
