AMPATI: South West Garo Hills a·jaoba da·o skulrangko kulipiltaiahani gimin gari gorarangni re·ruraanirango apchangket ong·ani dongjana gita aro manderangni re·ruraanirangoba maming neng·nikanirangko man·jana gita Mahendraganj aro Dalu Land Customs Station gita Bangladesh a·songona ro·ong salruraenggipa truck garirangni re·ruraanina South West Garo Hills a·jani District Magistrate, somoiko dingtangataha ine u·iataha.
Adita salrangna skang, South West Garo Hills a·jani District Magistrate, a·jani Police, District Transport Officer baksana Mahendraganj aro Dalu-ni Export & Import Association-rang baksa tom·aniko ong·atangenba, ro·ong salruragipa truck garirangni re·ruraanina somoiko dingtangataha.
Uandaken, da·o November 8 tarik dipetde Bangladesh a·songona ro·ong salruraenggipa garirang, attam 6:00 bajioni pring 6:00 bajiona re·ruraskana man·gnok aro ia somoi batahaode ro·ong salruragipa garirang ia ram agita re·na man·jawaha ineba District Magistrate u·iataha.
