SHILLONG: Meghalaya by-election-o tangka sualani a·selsa MDA-ni candidate-rang cheaha ine Congress dolni dilgiparang matnangtokengon, election-rangko ong·atanio tangka suale vote salaniko Congress dolsa a·bachengdilgipa ong·achim ine United Democratic Party (UDP) matnangatskaaha.
“Politics-ni itihasko an·ching name niatgenchimode, vote salna tangka sualaniko Congress dolsa a·bachengaha ine an·chingna nikna man·gen. Vote salna tangka sualaniko uamang an·tangtangan a·bachengdile da·o uamangni gipin dolrangko matnanganiko sawa bebera·na man·kugen?” ine UDP-ni general secretary Jeminio Mawthoh parakataha.
An·tangtang amako man·e Congress dol, gipinrangkosa matnangna jotton ka·enga ine janapatengon, Congress dolni iandake matnanganirangko manderang bebera·na man·jawaha ine UDP-ni dilgipa parakataha.
“Congress dol da·o be·gruangenggipa dolsa ong·aiaha maina Congress dolni ning·o pilakan meligrikna man·tokjaengaha. Doltangni ning·on meligrikna man·jaesa a·dokni damgittam by-election-oba Congress dol amako man·aha aro iako uamang ku·rachakna nanga,” ine Mawthoh aganaha.
Adita salrangna skang ong·atanggipa a·dokni damgittam by-election-o dingtang dingtang dolrang, vote-rangko salna gita tangka paisarangko sualahani a·selsa Congress dol chu·sokgipa ong·na man·jaha ine adita salrangna skangsan Congress dolni dilgipa Ampareen Lyngdoh matnangatahachim.
