SHILLONG: Assam aro Meghalaya a·dok damgnini simarango meligrikna man·jaenggipa biaprangoni Langpih-ona ia a·dok damgnini chief minister-rang, re·baenggipa November 16 ba 17 tariko re·ange niegen ine Meghalaya a·dokni Chief Minister Conrad K Sangma parakataha.
Sangma-ni parakatani gitade, ia a·dok damgnini simarango meligrikna man·jaenggipa biaprango ong·enga obostarangko ma·sie ra·na aro songni nokni manderang baksa agangrikna gita ia a·dokni damgnini chief minister-rang, Langpih-ona re·anggen.
“Ian a·dokni damgnini gisepo meligrikna man·jaenggipa biaprango manderangna ka·dongataniko on·na aro namatani cholko sandina ja·ku de·aniba ong·gen,” ine Sangma aganaha.
Chief minister-rangni Langpih-ona re·anganio uamang, dingtang dingtang songni dilgiparang aro dingtang dingtang dolrang baksaba agangrikanggen.
August jao ia a·dok damgnini chief minister-rang Guwahati-o tom·e chanchirimanio tik ka·gimin gita ia a·dok damgnini songgimin regional committee-rang, batanggimin jagnini gisepo, meligrikna man·jaenggipa simarangona re·ange obostarangko nieahachim ine nikna man·a.
Meghalaya aro Assam a·dokni gisepo meligrikna man·jaenggipa dam 12 songrangoni damdok biaprangko skanggipa bako namatchengna a·dok damgnini chief minister-rang tik ka·manahachim aro ia biaprangara, Meghalaya a·dokni West Khasi Hills, Ri Bhoi aro East Jaintia Hills a·jani ning·o donggipa Tarabari, Gizang, Hahim, Boklapara, Khanapara-Pilangkata, Ratacherra aro Assam a·dokchipakni Cachar, Kamrup Metro aro Kamrup a·jarang ong·engachim.
Indake ong·engon, ia a·dok damgnio songe on·gipa regional committee-rangba ia a·dok damgnini simarangko nieani ja·man da·o antisani gisepon report-rangko on·naba gnang ine kobor on·timgiparang parakataha.
