SHILLONG: Meghalaya a·doko Inner Line Permit (ILP)-ko ra·gatchina dabianiko chu·sokatanide ma·mong sorkarini jako ong·aia ine Robibar salo a·dokni Chief Minister Conrad Sangma parakatenba, a·dok sorkaride iani bidingo ma·mong sorkari baksa agangriknasan man·aigen ine talataniko on·angaha.
“A·doko ILP-ko ra·gatchina gita chingaba sorkariko didiangkugen. ILP-na chinga an·tangde resolution-ko pass ka·e chingni dakna nanggniko dakahachim,” ine Sangma, kobor ra·timgiparangna aganaha.
Ia sorkaride ILP-na resolution-ko ra·ahani gimin ILP-ko dabienggipa dingtang dingtang dolrangba ia sorkarini kamko mitteltokaha ine janapatengon, gitcham sorkaride ILP-ko nangnikja inesa agane resolution-koba ra·jahachim ine Chief Minister parakataha.
“Uni gimin chinga ia dabianiko chu·sokatna jotton ka·enga aro ian a·dok sorkarini dakna man·gipa kam ong·ja ine pilakan ma·sitokenga. Iako ma·mong sorkarisa chu·sokatna nangenga,” ine Sangma aganaha.
Ian uni gita mamingkoba ku·rachakna man·gijagipa kamsa ong·enga ineba Chief Minister, talataniko on·angaha.
Meghalaya a·doko ILP-ko ra·gatchina dabienggipani bidingo ma·mong sorkari, da·onan maming talatanirangko on·kujaengani gimin a·doko ILP-ko ra·gatchina dabienggipa dolrang suk ong·gijaniko mesoktokengachim ine nikna man·a.
