SHILLONG: Meghalaya a·dokna Cricket aro uandakgipa kal·susaanirango kal·giparangko seokengon, skanggipa a·doktangni Tribal-rangnan biaprangko on·chengna nanga ine Khasi Students Union (KSU)-ni dabienggipani bidingo a·dokni Sports & Youth Affairs Minister Banteidor Lyngdoh, talataniko on·angenba, ian a·songni dingtang dingtang biaprango kal·susaanirangko ong·atanio a·dokni chadamberangna cholko on·na gita dabianisa ong·enga ine parakataha.
“KSU-ni miksonganirangko anga namen ma·sia aro iani bidingo anga an·tangan sandina jotton ka·aha. Uamang a·doko atchigipa aro a·doko dal·bagipa non-Tribal-rangni bak ra·paanikode jegalenga ong·ja ine KSU talataniko on·ahani gimin anga kusi ong·a,” ine Lyngdoh, kobor ra·timgiparangna parakataha.
Ranji Trophy-na cricket kal·susaanio Meghalaya a·dokna kal·giparangoni bang·batakon gipin a·dokrangonikosa kal·atengani gimin ian KSU dolni, Meghalaya Cricket Association (MCA)-ko miksonge aganani gita ong·aha ineba Sports Minister aganaha.
“Ranji Trophy-o Meghalaya a·dokna kal·giparangoni maikai gipin a·dokrangonikosa sakbri sakbonga kal·atna man·a? Meghalaya a·doktangon kal·na changgiparang bang·a aro ian a·doktangni chadamberangna chol on·gijaniko mesokani gita ong·enga,” ine Lyngdoh aganaha.
Gipin a·dokrangoniko maini gimin kal·susagiparangko a·dokona rimbana nangenga ineba ua MCA-ko sing·doangaha.
Sports Minister-ni parakatani gitade, Meghalaya a·dokko man·chape salgro salaram jolrango cricket kal·aniko tang·doatna gita Board of Cricket Council in India (BCCI)-ni gitaba bang·bea tangka paisarangko chamatengachim.
“Cricket kal·anio tangka paisarang namen bang·a ine chinga ma·sia aro an·chingoba cricket kal·na changgipa chadamberang bang·en donga. Uamangna namgipa skie on·ani aro dilanikosan nangenga,” ine Lyngdoh aganaha.
Meghalaya a·doko dal·drobagipa gipin jatrangba changgipa sapgiparangde cholrangko man·na nanga ine janapatengon, a·dokna kal·giparangko seokengon uamangni changa sapani krisa ong·na nanga ine Sports Minister parakataha.
“Indake ong·genchimoba a·doktangni changgipa sapgipa chadamberangnan cholkode on·chengna nanga,” ineba ua aganaha.
Kal·giparangko seokengon, ua mingsinggipa manderangni ma·sigipa ong·aiani giminde seokna gita nangja ineba Lyngdoh parakataha.
“Kal·susaaniode politics dongna nangja ine anga an·tangde chanchia. Kal·giparangko seokengon an·ching mikkang niteani dongna nangja,” ine ua aganaha.
KSU aro MCA-ni gisepo maming ma·sisretgrikanirang dongjana gita ua dolgnini gisepo tom·aniko ong·ate agangrikdilgen ineba Sports Minister parakataha.
Dingtang dingtang kal·susaanirango Meghalaya a·dokna kal·giparangoni bang·batakon gipin biaprangonikosa kal·ate a·doktangni Tribal-rangnade biaprangko on·jaengani gimin KSU aro ADE dolrang jegale, kal·giparangko seokanio skanggipa Khasi aro Garorangkon seokchina gita dabitokengachim ine nikna man·a.
