TURA: Meghalaya a·dokni gitcham chief minister Mukul Sangma-ni somoio Congress dolni bang·bata membor-rangan uni namnikani gitasa kamrangko ka·na nangtokachim aro da·o uni ong·kataniara Congress dolna namgni ong·skagnok ine Tura-ni gitcham MLA Billykid A Sangma parakataha.
“Mukul Sangma-ni Congress-ko dilengmiting somoirango ua gipin dilgiparangko aro dolna kam ka·enggiparangkoba dal·na on·na sikjachim. Election-rangoba uni nokdangni manderangsa aro uni namnikgipa manderangnasan ua tikitrangko aro tangka paisani gita dakchakanirangkoba on·rongaiachim. Da·o uni ong·kataniara Congress dolna namgnisa ong·skagnok,” ine Billykid parakataha.
Shillong-ni Lok Sabha MP Vincent Pala-ko Meghalaya Pradesh Congress Committee (MPCC)-ni president songani ja·man Billykid-ba adita salrangna skangsan Congress dolona re·bapilahachim.
Billykid-ni parakatani gitade, Mukul Sangma-ni chief minister ong·miting somoirangoba Meghalaya a·dokni manderang aro mongsongbate Garo Hills-o bang·bata manderangan uni bil mesoke sason ka·na jotton ka·ani giminan kusi ong·tokjachim.
“Garo Hills-ni manderang aro Meghalaya a·dok gimikon uni bil jakkalanina suk ong·tokjachim. Uni iandakgipa kamrangni a·selan 2018 bilsini Assembly election-oba Garo Hills-o Congress dol, seat damchetkosan cherikna man·aiaha aro NPP-na seat dam 10-ko cheangskana man·aha,” ine Billykid aganaha.
Da·o Mukul Sangma aro uni manderang Congress doloni ong·katahani gimin Congress dolni gitcham dilgiparang aro an·tangtangko on·kange kam ka·gipa manderangba Congress dolona re·bapilgnok ineba Billykid parakataha.
“Meghalaya a·doko aro mongsongbate Garo Hills-o ua (Mukul), an·tangni nokdangni manderangkosan aro uni namnikgipa manderangkosan dakchakaiani a·selan Meghalaya a·doko Congress dal·rorona man·jaengachim. Da·alo uni ong·katani gimin Garo Hills-o bang·a manderangan kusi ong·tokengaha aro Congress-ona re·bapiltokengaha,” ine ua aganaha.
