TURA: Meghalaya Chamber of Commerce, GHADC-ni (Trading by Non-Tribals) Tenth Amendment Regulation Bill 2020-ko niam ong·ja aro non-tribal community ba gipin jatni badingchiwale cha·giparangna nama ong·ja ine aganenba ra·pilchina ba bon·atchina dabiaha.
Uandake GHADC-ni CEM Benedic R Marak-ko grongaon trader’s body, bill-ko pass ka·anio niam gita ong·gija kam ka·anirang bang·e donga ine matnangaha.
“Governor-oni bil on·nani dongijaan, gital regulation-ni paper-rangko mesoke bading-chiwalgiparangoniko tangka ra·enga. Iandakgipa obostako ra·chakna man·jawa, maidake indake ong·na man·a? Governor-oni maming u·iata ba uni ra·chakani dongijade bill-ko ra·gatna man·ja ine darangan u·itoka, ine trader’s body-ni President Wilver Greham Danggo aganaha.
Minggipin gital regulation-o janapgipa rate-ara gitcham rate-na bilongen bata, ineba Danggo aganataha.
“Skangode gong 3000 rate ong·achim, indiba da·ode 10,000-ona baridapataha. Iarangna gisepon bill-ko adita salrang skangsan pass ka·ako chinga u·ia, indiba bading-chiwale cha·gipa gipin jatrangoniko tangkako ra·aha, uamang March 2021-osan TNT license-ko renew ka·kuenga.”
Uandake badingchiwale cha·gipa gipin jatrangoniko license renew ka·na bang·e tangka ra·angode joltangni manderangan bosturang dam rakani gimin neng·nikanirangko chagrongna nanggen, ine janapenba Danggo, ia TNT Bill-ko ta·raken bon·atchina mol·molangaha.
