TURA: Meghalaya a·dokni Adhoc Upper Primary Skulrangkoba deficit-ni gadangona ra·doatchina dabianiko sorkarini knachakjaengani gimin re·anggipa December-ni 3 tariko Meghalaya Upper Primary School Teachers’ Association (MUPSTA) Garo Hills Region-ni gita Rongram jolo donggipa Allagre kal·chakramo jinma tom·bimonganiko ong·atangenba, sorkarini kamna suk ong·gijaniko parakangtokaha.
Ia tom·anio MUPSTA-ni dilgiparang, tom·anio dongpae bakko ra·gipa skigiparangna aganprakangengon, adhoc UP skulrangko deficit-ni gadangona ra·doatchina dabianiko MDA sorkari knachakna gisiko nangjaengani a·selsa skigiparang neng·nikanirangko chagrongna nangtokengkua ine parakangtokaha.
MUPSTA-GHR-ni president SR Marak-ni u·iatani gitade, special education officer-ni u·iataniko man·soe MUPSTA-ni dilgiparang deputy director-ko grongeon, dam 844 adhoc UP skulrangkosan deficit-ni gadangona ra·dona man·aigen ine ua bimingrangko segatchina ge·etataha aro uni ge·etanio pangchake list-ko tarion, dam 844 adhoc UP skulni head teacher sakprak aro assistant teacher sakgittamko list tarion ia dam 844 skulrangoni sak 3376 skigiparangsan biming nakataiahachim.
“Iani bidingo chinga chief minister-ko changni chang grongna gita jotton ka·ahachim aro ua ching baksa agangriknaba ku·rachakahachim. November-ni 28 tariko ua MUPSTA-ni dilgiparangko grongna tarikko tik ka·ahachim indiba ia tarikko MUPSTA CEC-ni president Keneth Shadap an·tangan ra·doatchina aganskaaha,” ine MUPSTA-GHR-ni president parakataha.
NPP-chi chalaienggipa MDA sorkario skigiparang ka·dongna man·jawaha ineba skigiparang parakataha.
