Kam ka·chakgipa biaprango me·chikrangko kragija dake kal·akaniko champengna mikrakataniko on·a

AMPATI: Me·chikrangni kosako ong·gija dakanirang aro mongsongbate kam ka·chakgipa biaprango me·chikrangko kragija dake kal·akna jotton ka·anirang batroroengani gimin iandakgipa kamrangni bidingo jinmana mikrakatanirangko on·na gita re·anggipa Bristibar salo, South West Garo Hills a·jani District Social Welfare Office-ni gita awareness program-ko Ampati-o ong·atangaha.
Ia program-ko a·bachengate on·angani somoio South West Garo Hills a·jani Deputy Commissioner Ch Ramakrishna, mongsonggipa sokgipa ong·e jinmana aganprakangengon, kam ka·chakgipa biaprango kam ka·enggipa me·chikrangko kragija dake kal·akaniara pilakni gitan ong·sianiko ra·baani ong·a indiba iandakgipa kamrangko kal·aka man·gipa me·chik aro dos dakgipa manderangba dos gita dake chanrongja ine parakangenba, iani giminsa iandakgipa kamrangni bidingo pilak gadangrangon aro mongsongbate me·chikrangni kam ka·batgipa biaprango agan-talate on·aniko dakna nangenga ine talatangaha.
Kam ka·chakgipa biaprangosan ong·aigija dingtang dingtang obostarango me·chikrangni kosako ong·gija dakanirangnaba ia tom·anio Deputy Commissioner mikrakataniko on·angaha aro iandakgipa case-rang baksa police station-rangona re·angon mande ra·aniko mesokrongjani giminba ua an·tangni suk ong·gijaniko parakangaha.
“Police station-rango iandakgipa manderangna maming mande ra·ani dongjani giminsa bang·bata manderangan, iandakgipa obostarangko chagrongna nanggenchimoba police station-rangona re·angna gong·tokjaenga,” ine Ramakrishna aganenba, iandakgipa obostarangko chagrongna nanggipa me·chikrangna dakchakanirangko on·enggipa cholrang, jekai Internal Complaints Committee, One Stop Centre aro uandakgipa cholrangni bidingo agan-talate on·angaha.
Ia program-ko ong·atanio Social Welfare department-ni ADC I/c AVD Shira-ba dongpae, bak ra·giparangna aganprakangengon, me·chikrangni kosako ong·gija dakgipa dingtang dingtang kamrangni gimin aganangenba, iandakgipa kamrangni kosako pangnan chadengchina me·chikrangko didiangaha aro an·tangtangni ma·sie ra·giminko an·tangtangni nokdangna, noksul nokripengrangna aro gipinrangnaba aganrikrikskachina gita didiangaha.
Iani ja·man dingtang dingtang session-rangko ong·atanio, DLSA-ni Advocate Samir Chakraborty, Ampati-ni Sr Medical & Health Officer Dr Lydia Marak aro Ampati-ni Sub-Inspector Tina G Momin, dingtang dingtang katta bichongrango pangchake, tom·anio bak ra·giparangna agan-talate on·angaha.
Ia awareness program-ko ong·atanio dongpae jinmana aganprakanggipa gipin manderangara, Ampati-ni DSWO ZR Marak, Zikzak-ni CDPO TK Marak aro gipinrang ong·a.