TURA: Garo Hills-ni skanggipa Sub Divisional Hospital-ko mijal Bristibar salo, Meghalaya a·dokni Health Minister James Pangsang K Sangma, Tura-oni kilometre 30-mang chel·ao donggipa Jengjal-o kulie on·angaha.
Ia hospital-ko Seventh Day Adventist (SDA) Mission-o bak ong·enggipa Vellore Christian Medical College-ni mingsinggipa doctor-rang chalaianggen aro ia hospital-o me·chik aro bi·sarangko sanna changgipa doctor-rang kamko ka·anggen.
Batanggimin bilsibrina kingking, Garo Hills-ni SDA Mission, ia Jengjal songo nursing home-koba chu·soken chalaiengahachim aro ia nursing home-o namnamgipa doctor-rangchi songni nokni manderangna an·seng baljokanirangko on·na kam ka·engachim.
Ia Sub Divisional Hospital-ko kulie on·angani somoio a·dokni Health Minister, jinmana aganprakangengon, batanggimin somoirangoba Vellore CMC-ni doctor-rang, Garo Hills-ni manderangna an·seng baljokaniko on·na kam ka·ahani gimin manderang, uamangni kamna jajrengna nangjawa ine parakataha.
“Vellore CMC-ni doctor-rang maikai manderangna an·seng baljokaniko on·na gita an·tangtangko on·kange kam ka·aha an·ching pilakan nikmanahani gimin Garo Hills-o an·seng baljokaniko on·na gita uamang baksa bakrimaniara namgipa ja·ku de·ani gita ong·aha,” ine Sangma aganaha.
Sorkari hospital-rango gitan ia hospital-oba manderangna indin sanna bananirangko on·gen ine talataniko on·angengon, 2022 bilsini March jaode ia hospital-o donggipa palangko ge 10-oniko ge 50-ona bariatgnok aro dingtang dingtang department-rango specialist doctor-rangba dongdapgnok ine Health Minister parakataha.
Health Minister-ni parakatani gitade, gall stone aro kidney stone gita dakgipa saanirangkoba ia hospital-o bakan Laprascopy dake sanna man·gnok aro mikkangchi gipin a·songrangoni specialised doctor-rangba ia hospital-ona re·bana gita SDA Mission baksa agangrikengaha.
Bi·sa bakgitchakrangko nambate sanna bana man·na gita ia hospital-o dingtangmanchagipa Intensive Care Unit (ICU)-ko kuligen ineba Health Minister parakataha.
