SHILLONG: Khasirangoni poedo serakgipa U Soso Tham-ni siani salko re·anggipa Sonibar salo, Khasi aro Jaintia Hills a·jarango songdongenggipa manderang aro dingtang dingtang dolrang, gisik ra·e maniangtokengon, ia salko ‘Education Day’ dake ra·gatchina Hynniewtrep Youth Council (HYC), a·dok sorkariko didiangaha.
U Soso Tham-ni chang 81-gipa siani salko gisik ra·na gita Sonibar salo, HYC dolni membor-rang, State Central Library-o tarie dongipa uni bimango pul malarangko pate mande ra·pilskaaniko dakangani ja·man ia salko ‘Education Day’ dake ra·gatchina HYC-ni president Robertjune Kharjahrin didiangaha.
Meghalaya a·doko lekka porako tang·doatgipa aro Khasi ku·sikko ra·dogipaba U Soso Tham-an ong·achim ineba Kharjahrin aganaha.
“Uni iandakgipa kamrangna mande ra·pilskaaniko on·na gita sorkari, ia salko a·dokni Education Day dake ra·gatna nangachim,” ine HYC-ni president aganaha.
U Soso Tham-ni chang 81-gipa siani salko gisik ra·na gita Khasi Authors’ Society aro Meghalaya sorkarini Arts & Culture department-ba nangrime dingtangmancha program-ko Shillong songjinmani St Anthony’s College-o ong·atangaha aro ia program-ko ong·atanio Meghalaya Assembly-ni Speaker Metbah Lyngdoh, mongsonggipa sokgipa ong·e bakko ra·angaha.
2020-21 bilsirango State board aro Central Board-ni dingtang dingtang porikkarango Khasi aro MIL subject-o bang·bate mark man·gipa chatro chatrirangna dingtangmancha ia program-ko ong·atanio mande ra·pilskaaniko dakangjolaha.
Ia apsan salon, U Soso Tham-ni siani salko gisik ra·na gita gipin dolrangba dingtang dingtang biaprango program-rangko ong·atangaha.
