SHILLONG: Meghalaya a·doko indita bilsirangna State Planning Board (SPB)-ni maming kamrangko nikna man·srangjaenga ine Sombar salo Nationalist Congress Party (NCP)-ni state president aro State Programme Implementation & Monitoring Committee-ni chairman Saleng A Sangma parakatenba, nanggenchimode ia Planning Board-ko bon·atsrangchina gita ku·pattianiko on·angaha.
“Angni chanchiani gitade, Planning Board-o gisik nanggupa manderang dongjaskalde maming kamrang ong·jawa aro ian board-ni membor-rangba TA, DA gita dakgipa man·anirangko ra·nasan membor ong·e donga gita ong·aiaenga. Uni gimin angni chanchiani gitade, iako indin donana bate bon·atsrangon nambatgen,” ine Sangma aganaha.
Bilsibrio ua changsasan Tura-o Board-ni tom·aniko nikengkua ine janapatengon, “Planning board-ni tom·na okamaniko anga changsasan nikengkua indiba planning board-ni tom·anikode sorkarini nangani kri bilsio changsa ba changgnide ong·atna nangachim,” ine NCP-ni state president parakataha.
Planning board-oni ku·pattianirangko ua changsaba nika dongkuja ine janapatengon, co-chairman-rangoniba changsaba board-ni tom·aniko ong·atna okamaniko ua nika dongkuja aro tom·anirangan dongjaenga ong·ode a·doko planning board dongani maming namgni dongjaenga ine Sangma parakataha.
“A·dok sorkarina planning board-an ku·pattianirangko on·gipa ong·na nangachim indiba planning board-onin maming ku·pattianirang dongjaenga ong·ode maikai sorkari kamrangko nambate ka·na man·gen?” ine Sangma sing·doangaha.
