SHILLONG: Salgro salaram a·dokrango Armed Forces (Special Powers) Act (AFSPA)-ko ra·gatani a·selan sipai dolrang skatang bilrangko jakkale dosgri manderangko sinjete rona man·engani gimin ia AFSPA-ko salgro salaramni pilak a·dokrangoniko chu·gimik ra·galatchina gita Meghalaya a·dokni Chief Minister Conrad Sangma dabiangtaiaha.
Nagaland a·dokoniko AFSPA-ko ra·galna gita obostarangko nipiltaichina ma·mong sorkari, dingtangmancha committee-ko songe on·angahani giminba ua ma·mong sorkariko mittelpilataha.
“Nagaland a·dokoniko AFSPA-ko ra·galna gita obostarangko nipilchina committee-ko songna ra·chakahani gimin anga dingtangmancha India sorkariko aro Union Home Minister Amit Shah-ko mittelpilna ska indiba ia committee, salgro salaram a·dok gimikkon nipilna nanga,” ine Sangma, social media-o parakataha.
Nagaland a·dokni Chief Minister Neiphiu Rio-ni parakatani gitade, Nagaland a·dokoniko AFSPA-ko ra·galpilna gita obostarangko nipilna gita committee-ko songe on·manaha aro ia committee, sal 45-ni gisepon sorkarina report-ko on·anggen.
Re·anggipa December-ni 23 tariko Union Home Minister Amit Shah, Nagaland a·dokni Chief Minister, Assam-ni Chief Minister Himanta Biswa Sarma, Nagaland-ni Deputy Chief Minister Y Patton aro Naga People’s Front (NPF)-ni dilgipa TR Zeliang baksa New Delhi-o tom·e chanchirimangani ja·man AFSPA-ko ra·galpilna gita obostarangko nipiltaichina committee-ko songe on·angahachim.
Re·anggipa December-ni 4 tariko Nagaland a·dokni Mon a·jao sak 14 dosgri manderangko army-rangni skatang goe galani ja·man, AFSPA-ko ra·galpilchina dabianirang bilakbatangahachim.
