SHILLONG: COVID-19 sajinmani a·sel songsalna dangdike on·ani aro lekka poraniko on·anio nangchakeaniko man·batahani gimin ia 2022 bilsini gisepo Social Welfare aro Education department-na gisik on·bate kamrangko ka·china gita a·dokni Congress dol, Meghalaya Democratic Alliance (MDA) sorkariko didiangaha.
Congress Legislature Party (CLP)-ni dilgipa Ampareen Lyngdoh-ni parakatani gitade, Covid-19 sajinmani a·sel songsalna dangdike on·ani aro lekka poraniko on·anian nangchakbataniko man·ahani gimin uamang ia gital 2022 bilsini gisepo social welfare aro education department-nan sorkari gisik on·bate kam ka·gen ine ka·dongsoenga.
“Ia gital bilsio re·mikkangengon, chingni ku·pattianirangkoba ra·e sorkari kam ka·gen ine anga ka·dongenga. Meghalaya a·doko songdongenggipa manderangni namgnina ra·gatgipa program-rangna gisik on·china anga sorkariko nangnikenga maina Covid-19 sajinmani a·sel nangchakeaniko man·batgipa kamrangoni social welfare-ba mingsa ong·a ine anga an·tangde chanchia,” ine Lyngdoh aganaha.
Covid-19 sajinmani a·sel skulrango poraienggipa bi·sarang bang·en gimaatako man·na nangaha ine janapatengon, “Ia bilsi an·chingna namgipa ong·genchimode bi·sarangba skulrangchi re·pilna man·gnok ine anga ka·dongenga. Ia 2022 bilsio sorkari mai dakgipa ja·kurangko de·a an·ching nina,” ine CLP-ni dilgipa parakataha.
Ia gital bilsio lekka porani gita neng·nikanirangko namatchina sorkariko didiangengon, “Bang·bata bi·sarangan skulrangchi re·na chol man·pajahani a·sel an·tangtangni poraianirango gimaataniko man·na nangtokaha. Uni gimin bi·sarangna lekka pora on·aniko namdapatna man·genchimode uan nambatgipa ong·gen,” ine Lyngdoh parakataha.
India a·songni bang·bata biaprangon COVID-19-ni Omicron rokom giproroengahani gimin Meghalaya a·doko songdongenggipa manderangko ia kenbegnigipa sabisioniko chel·chakchina gitaba ua a·dok sorkariko didiataha.
