SHILLONG: Meghalaya a·doko Bharatiya Janata Party (BJP)-ko dilenggipa mandeko namniktokjae adita meligrikgijanirang donga ine BJP-ni national vice president aro Meghalaya a·dokni in-charge Dr M Chuba Ao parakataha.
Dr Ao-ni parakatani gitade, BJP-ni mitam dilgiparang, BJP-ni state president Ernest Mawrie-o suk ong·niktokjaengani gimin BJP-ni ning·o adita meligrikgijani ong·enga.
Batanggimin somoirangonin Meghalaya a·doko BJP-ni mitam dilgiparang, BJP-ni state president Ernest Mawrie-ko ra·galchina dabitokengani a·sel dolni ning·o bakgni ong·engachim ine nikna man·a.
BJP doloni koborko on·ani gitade, iandake BJP-ni ning·o meligrikna man·jaengani a·selan North Garo Hills Committee-ni sak 15 BJP dilgiparangba, doltangoni ong·kate kattokaha.
Meghalaya a·doko BJP dolni membor-rang meligrikna man·jaengani gimin an·tangni suk ong·gijaniko parakatengon, “Darang dilgipaan, mande sakantini nangnikanikode chu·sokna man·jawa. Angni chanchiani gitade, ia dilgiparangni gisepo ma·sisretgrikanisan ong·engakon,” ine Dr Ao aganaha.
Ia meligrikna man·gijani a·selko ua sandina a·bachengengaha ine talatangengon, an·tangtangba ia meligriikgijaniko namate BJP-ko bilakbatatna gitasa kam ka·china Dr Ao, BJP-ni membor-rangko didiangaha.
