TURA: Upper Chandmari jolni Gandrak darejolo mini Sukrobar salo huro mang gittam voltage bang·gipa bijoli sringrang gita re·bae bijoli nange siaoni jenten jokaha.
Koborko man·soani gita batangggimin jagnimang uarang ua jolon dongeng-achim, huro bima bi·sa manggni baksa Tura a·brioni cha·ani amroroe a·jolona sokbaaha.
Uamang 11 kv bijoli bilakgipa siliting dongako ma·sigija bol pangsaoni panggipinona bilbatna jotton ka·engachim aro a·jol gipinona batsotangaha. Bijoli silitingo nangon huro mangg gittam gobrangata gita a·aona ga·akonaha.
Manggni adita saknaa-ko man·aha, manggigipin adita somaina sibokaha.
Ua a·selni bidingo aganao DFO Arpiyush Ch Sangma indake aganaha, “A·selko knarin chingni manderangko biapona wat-ataha aro saoba napbaako champengna a·jolko chang-duulaha. Hurorangko chel·-chakna bijoliko kimitat-china chinga MeECL bijoli department-na kobor on·ataha.
“Chinga hurorangko namedaken nirokenga indiba sepangona re·angna man·ja maina buring diltua. Bon·akamo uarang re·na, maldona aro a·bri kosakona re·angna man·aha,” ua agandapaha.
