TURA: 2021 bilsini Meghalaya Teachers Eligibility Test (MTET)-ko pass ka·gipa candidate-rangkoba apsan interview ra·na miksonge dorgasto galani tarikko DSEL ra·dodaptaiahani a·sel 2019 bilsini MTET-ko pass ka·gipa candidate-rangde cholrangko man·tokjaenga ine A·chik Youth Movement for Betterment of Society (AYMBS) matnangatenba, 2019 bilsini MTET-ko pass ka·gipa candidate-rangnade dingtang interview-ko ra·china gita sorkario dabiangaha.
AYMBS-ni president Peterjob A Sangma-ni parakatani gitade, 2019 bilsio MTET-ko ra·taianio pass ka·gipa candidate-ko kamo rimnapna miksongesa dorgasto galani bon·kamgipa tarikko re·anggipa 2021 bilsini December 10 tarikna DSEL u·iataniko on·manahachim indiba 2021 bilsini MTET pass ka·gipa candidate-rangnaba apsan somoion cholko on·na miksongenga dorgasto galani bon·kamgipa tarikko ja·mano DSEL, January 18 tarikona ra·dodapattaiaha.
“Krismasni somoio ong·e 2021 bilsini MTET-ko pass ka·gipa candidate-rang dorgastorangko galrikna man·jahani giminsa dorgasto galani bon·kamgipa tarikko DSEL ra·dodapattaiaha indiba ian 2019 bilsini MTET-ko pass ka·gipa candidate-rangna cholko on·ja gita ong·engani gimin iandake somoi ra·dodaproroaniko chinga raken jegalenga,” ine AYMBS-ni president parakatenba, 2019 bilsini MTET-ko pass ka·gipa candidate-rangna ta·raken dingtang interview-ko ra·na nanga ine sorkario dabiangaha.
