SHILLONG: Shillong songjinmani Mawdiangdiang-o rikenggipa Meghalaya Legislative Assembly-ni gital nokko May jao matchotatna gita sorkari somoiko donsoahaoba ia gital Assembly nokko da·o donsogimin somoi gita matchotatna man·jawaha.
Budbar salo, ia gital Assembly nokko Assembly-ni Speaker Metbah Lyngdoh, nieani ja·man ia gital Assembly nokko May jao matchotatna man·jawaha ine parakataha.
Lyngdoh-ni parakatani gitade, Covid-19 sajinmani a·sel, kam ka·gipa manderang chu·ongjaengani a·sel aro dingtang dingtang a·selrangchi ia gital Assembly nokko somoi gita matchotatna man·jaenga.
“Ia kamko gital dongimin somoi gita matchotatskachina anga pilak department-rangko aro ia nokko rikenggipa company-ko ge·etataha. Chinga ia gital Assembly nokko June jani bon·angachibara matchotatskana miksongengachim indiba da·o mikkang jarango mai obostarang an·chingna ong·gen, unosa kam matchota matchotgijade pangchakaigen,” ine Assembly Speaker aganaha.
Lyngdoh-ni parakatani gitade, ia gital Assembly nokko rikanio tangka paisani gitade maming jajrengna nangani dongjawa ine a·dok sorkari, una ku·rachakaniko on·manaha.
“Chingni ma·mongoniko bi·atgipa gong kror 100 tangkarangna chinga sengenga. Tangka paisarangna chinga Union Finance Minister Nirmala Sitharam-ko grongegen,” ine Lyngdoh aganaha.
Ia jani bon·angachibara ua nok rikaniko nietaigen ineba Speaker parakataha.
