SHILLONG: East Khasi Hills a·jani Mawsynram-o Weisohpieng songni bilsi 56 ong·gipa mande saksako kragija dake so·ote galaha ine Khasi Hills-ni A·chik Holistic Awakening Movement (AHAM), All Khasi Hills A·chik Federation (AKHAF) aro Garo Students Union (GSU) Dangar regional unit matnangatenba, ia mandeko so·otanio jak donggipa manderangko ta·raken rim·e nanga gita sastirangko on·china sorkario dabiangaha.
Iani bidingo dolgittam NGO-rang, dingtangmancha songni manderang baksa tom·aniko ong·atangaha aro ia tom·aniko songni Nokma Pranesh Sangma dilangaha.
Ia tom·anio songni bang·bea manderangba bakko ra·angtokaha aro ia mandeko so·otanio jak donggipa manderangko rim·china dabiangtokaha. Sianggipa mandena dingtangmancha mombati so·e bi·chakanirangkoba dakangaha aro bi·rimanio sianggipa mandeni nokdongba dongpae bak ra·angaha.
Koborko on·ani gitade, bilsi 56 ong·gipa Sephal R Marak-ko re·anggipa bilsini December 12 tariko, uni Chirakata-oni Weisohpieng songona re·bapilengmiting somoio, ma·sina man·gijagipa manderang so·ote galahachim.
Jinma tom·bimonganiko ong·atanio AHAM Khasi Hills zone-ni president Labius Arengh, jinmana aganprakengon, ia mandeko so·otanio jak donggipa manderangko ta·raken rim·china police-rangko didiangaha.
“Sianggipa mandeara nokdangko aldumittanggipa mandesa ong·achim indiba da·o ua dongjahani a·sel uni nokdang, maming janggi tangani cholrang dongja gita ong·aha. Uni gimin ia a·selni bidingo ta·raken inquiry-ko dake ia nokdangna tangka paisarangko on·skachina chinga sorkariko mol·molenga,” ine AHAM-ni president aganaha.
