TURA: Meghalaya Job Reservation Policy-ko nipiltaichina dingtang dingtang dolrangni dabianiko A·chik Youth Welfare Organisation (AYWO) jegalatenba, Meghalaya a·doko A·chikrangni jelbra jelsuani da·o batrorobaengahani gimin batesa A·chikrangna kam donaniko 50 percent-ona bariatchina a·dok sorkariko didiangaha.
Da·o dipet Meghalaya a·dokni Job Reservation Policy-o A·chikrangna 40%, Khasi-Jaintia-rangna 40% aro gipinrangna 20% ka·e kamrangko kange donengachim ine nikna man·a.
Indake ong·engon, ia job reservation policy-ko nipiltaie, nanga gita taridapchina badiaba badiaba dolrang, sorkario dabitokengani gimin AYWO jegalatskaenba, A·chikrangna kanganiko komiatgija batesa 50 percent-ona tang·doatchina sorkariko didiangskaaha.
“Meghalaya a·dokko man·chengaoni je niamkon a·doko songdongenggipa jatrangna tarie on·ahachim, ia niamara jatni jelbra jelsuani kri aro obostani kri tarigimin niamrangsa ong·ani gimin ia niamko nipiltaichina agananiara namen ra·chakna man·gijani ong·enga. Da·ororo A·chik jat namen jelaha aro skia pora dongpagipa chadamberang bang·batan kamgri ong·e dongna nangtokenga. Uni gimin A·chikrangna kam donaniko 50 percent-ona ra·dodapatgenchimode A·chik a·song sorkariko namen mittelbegenchim,” ine AYWO-ni secretary Lyiend Roshan Raksam Marak parakataha.
Khasi Hills a·ja baksa tosusagenchimode A·chik a·songo karkanarang, skulrang aro uandakgipa kam ka·e cha·ani cholrang namen komikuenga ine janapatengon, A·chikrangna job reservation policy-o kam kanganiko 50 percent-ona ra·doatgenchimode A·chik a·songoba dingtanganiko nikna man·genchim ine Marak parakataha.
