TURA: West Garo Hills a·jao donggipa Magurmari Government Aided Secondary School-ni school managing committee (SMC)-ko ma·a paarang baksa tom·e chanchirimchenggijasa songaha ine matnanganiko skulni secretary jegalataha.
Ia skulni SMC-ko niam gri songaha ine matnanganirangna talataniko on·angengon, re·anggipa bilsini November 14 tarikon, chatro chatrirangni ma·a paarang aro local guardian-rang baksa skulon tom·aniko ong·atangaha aro tom·anio Magurmari songni gaonbura an·tangan dongpae tom·aniko dilahachim ine SMC-ni secretary Abdul Mozid Sk parakataha.
“Ia skulni SMC-ko Assam Education Department Rules aro Order Volume 1 Revised Edition (1955)-ni dingtang dingtang niamrango pangchakesa songaha. Iani bidingo badi ka·enggipa mandekoba SMC-ni membor songahachim,” ine SMC-ni secretary parakataha.
Ia SMC-ni kosako Education department-na badi ka·anirangara pilakan tol·e badi ka·anisan ong·aia aro maming pangchakani gri matnanganisan ong·aia ineba ua talataniko on·angaha.
