SHILLONG: East Jaintia Hills a·jani Mynkre-o donggipa ro·ong quarry-ko chalaianio niamrangko ja·rikjaenga ine jolo songdongenggipa manderang badi ka·tokahani gimin ia quarry-ko Jaintia Students Union (JSU)-ni dilgiparang, chipe donataha.
Kobor on·timgiparangni u·iatani gitade, ia ro·ong quarry-ko NHAI-chi dilenggipa GR Infra Project ingipa company chalaiengachim indiba ia quarry-ona JSU-ni dilgiparang, re·ange nieon, ia ro·ong quarry-o nangana bate wal·kurang ong·katenganichi manderangna namgijaniko ra·baenga ine nikahani gimin JSU-ni dilgiparang, ia ro·ong quarry-ko chipe donatchengaha.
Ia ro·ong quarry-o nangana bate wal·ku jokaniko champengna gita ja·kuko de·china dabiangengon, wal·kurangni jokaniko komiatna ja·ku de·kujaskal ia ro·ong quarry-ko kulipilna man·kujawa ine JSU-ni dilgiparang parakataha.
