SHILLONG: Garo Hills Autonomous District Council (GHADC) aro Jaintia Hills Autonomous District Council (JHADC)-na sorkarini chamatgipa tangka paisarangko jakkalsreta ine matnanggipani bidingo audit ka·aniko da·onan matchotatkujaengani gimin a·dokni BJP dol sing·doangaha.
“Iani bidingo anga chief minister baksa agangrike, am·sandianiko ta·rakatchina didigen. Maiba kamni gimin am·sandianirangko dakengon, uko somoi ra·chae donggija dongimin somoi gitan matchotatna nanga,” ine BJP-ni state president Ernest Mawrie parakataha.
Mawrie-ni parakatani gitade, iani bidingo ua pilak political dolrangni tom·ani somoioba sing·doahachim aro ua somoio Chief Minister Conrad Sangma an·tangan, district council-o ong·enggipa obostarangko tale ma·sie ra·na gita local audit-ko dakchina ge·etaha ine aganahachim.
Da·oba Garo Hills-o ong·gija dakani bidingo changni chang badi ka·anirangko man·soengkua indiba audit report-kode da·onan man·skakujaenga ineba BJP-ni state president aganaha.
Ia tangka paisarangko songadam nokadamrango namroro silroroaniko ra·bana gitasa ma·mong sorkari, special grant-ni ning·o chamatahachim ine talataniko on·angengon, iani bidingo jinmaba u·iatna man·na gita inquiry-ko ta·rakatchina ine Mawrie, a·dokni District Council Affairs Minister-ko didiataha.
GHADC aro JHADC-na Special Assistance Grant-ni ning·o ma·mong sorkarini chamatgipa tangka paisarangko jakkalsretaha ine matnanganirangko man·ahani gimin iani bidingo CBI-chi inquiry-ko dakatchina gita BJP dabiahachim indiba ia damgni ADC-rango tangka jakkalaniko am·sandina gita sorkari, local audit ka·chinasa ge·etaniko on·skaahachim.
Indake ong·engon, JHADC-ni account-rangni bidingo audit ka·ani report-kode bakan man·gnok ine official-rang parakatskaaha.
