NEW DELHI: Re·anggipa January 19 tarikoni gimaenggipa saksak bilsi 20 ong·gipa South West Garo Hills (SWGH) Ampati-ni me·chik bi·sako Delhi Achik Association (DAA), mija February 2 tariko New Delhi-ni Najafgarh joloniko naljokataha.
Me·chikni aganani gitade, ua West Bengal-ni Siliguri-ni saksa me·sa baksa mikcha ka·sagrikaha. Me·asa, jean an·tangni bilsiko parakna jechaka-chim, ua New Delhion dongengachim, jeonan me·chik bi·sa re·anggipa jao relo songree sokanga-hachim.
“Me·chik bi·sako noko nikjani gimin uni nokdangni manderang re·anggipa January 19 tariko Ampatio police-na badi ka·eaha-chim. Indake ong·gen-chimoba ja·mano me·chik bi·sa baksa agangrikna man·a gimin aroba ua namen dongenga ine phone-o aganatani gimin badi ka·giminkoba ra·pila-hachim ine DAA president, BD Sangma New Delhi-oni phone-o aganataha.
Ia me·chikara Garo Hills-onin ong·katgijagipasa, maidaken rel tikitrangko ra·enba Delhiona sokbapila uamang ma·sipiljaha. Ia me·chikara New Delhiona re·bana skang, ‘Free Fire’ online game-ko kal·e ranta ong·aha jeon ua ia me·sa baksa melienba ka·sagrikaona sokaha ine Sangma aganaha. Ia me·chik bi·sako sandienba uni nokdangni manderang baksa nangrimgrikatchina gita SWGH-ni saksa woman police, DAA-ni dakchakaniko am·ataha. Uamangni aganani gitade uni nokdangni manderang, uni gimaonin namen duk man·tokbeengachim.
“Chinga adita DAA memborrang, me·chik saksako rimbitangenba uni phone-ko Najafgarh-ona sandiangaha aro uni donggipa nokona sokang-enba noktangona re·pil-china gita uko didiaha,” Sangma agandapaha.
Me·chiko mija February 2 tariko naljokateaha.
Me·chik bi·sa da·o dipetode, DAA-ni saksa me·chik memborni simsakanio ong·enga aro February 5 tariko Garo Hills-oni me·chikma saksani sokangao un baksa watatgen ineba Sangma aganaha.
