TURA: Baghmara Greater Water Supply Scheme-ni kamrang da·o 75 percent-de matchotaha aro ia project-ko ia bilsini May jaon a·bachengate on·gnok ine Bristibar salo, a·dokni Chief Minister Conrad K Sangma parakataha.
Chief Minister-ni parakatani gitade, ia gong kror 63.50-ni project-na NESIDS aro State Fund-ni ning·o tangka paisarangko chamaha aro ia water supply scheme-ko matchotahaode ia Baghmara aro wilwilao donggipa dam 16 songrangna ringani chirangko on·na man·gnok.
“Ia Baghmara Greater Water Supply Scheme-ara manderangni ka·oksibee nisengenggipa project ong·a aro da·o ia project-ni kamrang 75 percent-de matchotahani gimin ia water supply scheme-ko chinga ia bilsini May jaon a·bachengate on·na ka·dongenga,” ine Chief Minister parakataha.
