TURA: South West Garo Hills a·jao donggipa Boldamgre constituency-ni MDC Stevie Marak, All India Trinamool Congress (AITC)-oni ong·kate, National People’s Party (NPP)-o napskana miksongenga ine parakataha.
Boldamgre MDC Stevie Marak-ba Congress tikitchi susae MDC-na seokako man·ahachim indiba adita salrangna skang, Garo Hills Autonomous District Council (GHADC)-o Congress dolni pilak MDC-rangan AITC-o napgopangani ja·man Marak-koba AITC-o ong·na manderang ka·dongsotokengachim.
Indake ong·genchimoba, adita salrangna skang, GHADC-ni gital chief executive member (CEM)-ko seokna election-ko ong·atanio Stevie Marak baksana Shyamnagar constituency-ni MDC Habibuz Zaman-de NPP-ni Rakesh Sangma-na pu·one uko gital CEM ong·na dakchakskaahachim.
Boldamgre MDC Stevie Marak-de da·o NPP-o napangna skaniko parakatahaoba AITC-ni sakgipin MDC Habibuz Zaman-de iani bidingo da·o dipet mamingkoba parakskakujaenga.
Da·o dipet GHADC-o anti-defection law dongkujani a·selan MDC-rang, dolsaoni dolsaona katjojoe rona man·engkua aro uandaken Stevie Marak-ba Congress-oni AITC-o napangani ja·man da·o NPP-o napskana manchienga.
“Anga an·tangni constituency-na kamko ka·anio AITC-ni gita maming dakchakanirangko man·jahani gimin suk ong·jae NPP-o napskana miksongengaha. Boldamgre GHADC constituency-ba Ampati LAC-ni ning·o ga·akgipa constituency-an ong·achim indiba joltangni MLA angni constituency-na maming dakchakanirangko on·jahani gimin anga suk ong·jaha,” ine Marak parakataha.
Meghalaya a·doko NPP bilakbatrorobaenga aro mikkang bilsini election-oba NPP dolan gnigipa changna sorkariko rikpiltaiani cholrang donga ineba Marak aganaha.
“Meghalaya-o Congress dolde bon·angengaha aro AITC-de gitalsa ong·e bilakna man·kujaenga. Ampati-o angna chakgipa manderang bang·batan angko TMC-oni ong·kate da·o mikkang chang election-o chenagipa dolo napskachina aganaha. Manderangni mol·molaniko man·ani ja·manosa anga AITC-oni ong·kate NPP-o napskana tik ka·aha,” ine Boldamgre MDC parakataha.
