TURA: National Science Day-ko maniani bak gita antigimikna ong·atenggipa ‘Vigyan Sarvatra Pujyate Festival’-ko Mongolbar salo, Tura Science Centre-oba a·bachengataha.
India a·songni bilsi 75 gapaniko maniani bak gita ia program-ko India sorkarini Ministry of Culture aro Principal Scientific Adviser Office-ni gita ong·atchina ge·etaniko on·ahachim aro uandaken ia program-ko February 22 tarikoni re·baenggipa February 28 tarikona Shillong-ni All Saints Hall, IGP aro West Garo Hills a·jani Tura Science Centre-o ong·atengachim.
Tura-o ia program-ko a·bachengatani somoio College of Teachers Education-ni Principal Dr Meena A Sangma, mongsonggipa sokgipa ong·e jinmana aganprakangengon, mandeni salanti janggi tanganio Science aro Technology-ni nangchongmotgipa ong·ani bidingo talataniko on·angenba, antigimikna ong·atenggipa program-o donge an·tangtangni namgnina skie ra·china gita chatro chatrirangko didiangaha.
Songsalni namgnina kamrangko ka·engani gimin ua dingtangmancha Meghalaya Science Society-koba mittelpilangaha.
Ia tom·aniko West Garo Hills a·jani gitcham District School Education Officer SK Saha dilangaha aro rimchaksoani kattarangko Tura-o donggipa Meghalaya Science Society-ni Secretary Dr Madhusudan Saha aganangskaaha.
Ia antisana ong·atenggipa program-o Science Book Exhibition, ISRO-ni Exhibition on Wheels, Science & Technology Exhibition, Open Quiz, Extempore Speech, Innovative Ideas Competition, Science & Technology poster-ko mesokani, Science film-rangko mesokani, skie on·ani aro uandakgipa program-rangko ong·atanggen.
Ia antisana ong·atenggipa program-o 2021 bilsini SSLC aro HSSLC porikkao Mathematics aro Science & Technology-o bang·bate mark man·gipa chatro chatrirangna dingtangmancha boksisrangkoba on·angjolgen.
