SHILLONG: Re·baenggipa 2023 Assembly poll-o, gitcham Assembly Speaker Martin M Danggo-ko Ranikor constituency-o aro Umsning MDC Macdalyne Sawkmie-ko Nongpoh constituency-o susaatgen National People’s Party (NPP) Mongolbaro parakataha.
Mijalo party office, Shillongo program ong·atgipao iamang sakgni baksa adita gipin dilgiparangni official-ni gita NPP-o ja·napeani ja·mano iarangni bidingo parakaha.
Malki-Laitumkhrah MDC, John Fantin Lakadong aro Nongshken MDC Grace Mary Kharpuri mangba official-ni gita Butbaro party-o bakrimaniko dakanggen.
Danggo aro Sawkmie baksana, gitcham JHADC CEM, Hambertus Nongtdu, gitcham KHADC CEM Manstudy Nongrem, gitcham MDC Thomas Nongtdu, aro gitcham UDP Ri Bhoi vice president Reynold Kharkamni mangba NPP-o uamangni chakgiparang baksa napeaha.
Uamangko party-ona rimchaksoani kattarangko aganengon, jensomoio saobarang party-ona re·baa, unon maiaba miksongani donga, jeon political pary uamangna ga·chataniko on·gen aro NPP manderangnan kamrangko ka·enga ine NPP National president aro Chief Minister, Conrad Sangma aganaha.
Unomitingo, NPP national Vice President aro Deputy Chief Minister, Prestone Tynsong agana je 2023 Assembly poll-o NPP, chu·gimik chegopna nienga.
