TURA: Bristibar salo a·dokni Chief Minister Conrad K Sangma, dingtang dingtang program-rango bak ra·pana gita South West Garo Hills a·jaona re·angon, Ampati-o dingtang dingtang dolrang, an·tangtangni suk ong·gijaniko mesokna gita nisan gisimko ra·e nichaksotokaha aro uni kosako chrik a·bokanirangko daksotokaha.
Garo Hills gimikon GHADC-ni gital chief executive membor (CEM) Rakesh Sangma-ko ra·galpilchina dabitokengachim ine nikna man·a. Gital CEM-ko ra·galpilchina dabitokengoba da·onan sorkari, manderangni dabianiko knachakjaengachim aro Rakesh an·tangba kamko wate on·kujaengachim.
Uandaken Bristibar salo, South West Garo Hills a·jani dingtang dingtang dolrang nisan gisimko ra·e, chief minister-ko Ampati-o nichaksotokaha aro uko re·angpilchina chrik a·boktokaha.
Bristibar salo a·dokni Chief Minister, Rerapara C&RD Block-ni gital building-ko rikna pangchakaniko songe on·na aro SHG mela-ko a·bachengate on·na South West Garo Hills a·jaona re·angahachim. Uni ja·mano ua joljol Zikzak-onaba re·ange, game ge·e cha·giparangni FOCUS program-oba bakko ra·eahachim.
Indake ong·engon, ia apsan salon, Rajabala-oba gital CEM-ko jegalenggipa manderang, Chief Minister Conrad Sangma, CEM Rakesh Sangma aro una chakenggipa MDC-rangni bimangko tarienba jinma so·e galtokaha.
