TURA: Tura jillani dingtang dingtang biaprango aro mongsongbate chiring chibisikrango skatang jabol galanirangko nirok sandijaenga ine Tura-o donggipa Urban Affairs-ni Executive Engineer aro West Garo Hills a·jani Deputy Commissioner-ni kosako A·chik Holistic Awakening Movement (AHAM) FIR ka·doangaha.
Adita salrangna skangsan, Tura-ni Chandmary-o gital tarigipa robol kal·chakramo ma·manti kattarangko semikmike nosto ka·ahani gimin AHAM-ni kosako Urban Affairs department-ni gita FIR ka·angahachim ine nikna man·a. Tura-ko Winter Capital dakchina dabie AHAM-ni manderang, Chandmary robol kal·chakramo ma·manti kattarangko see donangahachim.
Indake ong·engon, Tura jillani mongsonggipa biaprango aro mongsongbate chiring chibisikrango jabol galaniko Urban Affairs-ni Executive Engineer aro Deputy Commissioner, nirokjaenga aro ian India a·songo dongimin niamrangko pe·ani gita ong·enga ine official sakgnini kosako AHAM-ni president Georgeprince Ch Momin, Tura police station-o FIR ka·doangskaaha.
“Tura jillani dingtang dingtang biaprango skatang jabolrangko galenganichi manderangni an·seng baljokanina namgijaniko ra·baenga aro ian Indian Constitution-ni Article 21-ko pe·ani ong·enga. Tura jillao skatang jabol galaniko DC office-oni sepangon donggipa Tura Bazar jolrango bang·en nikna man·enga,” ine AHAM-ni president, FIR-o parakataha.
