SHILLONG: Hynniewtrep National Liberation Council (HNLC) bobil dol baksa agangrikna gita ku·baltitimgipako seoke on·ahani gimin Robibar salo HNLC bobil dolni dilgiparang sorkariko mittelpilataha.
HNLC bobil dol baksa agangrikaniko a·bachengatna gita adita salrangna skangsan a·dok sorkari, gitcham IAS officer Peter S Dkhar-ko ku·baltitimgipani kamna seokahachim ine nikna man·a.
Ku·baltitimgipako seokani gimin sorkariko mittelpilangengon, ia agangrikaniko chu·sokgipa ong·atna gita sorkari kakket ong·e kam ka·gen ine HNLC bobil dolni general secretary Sainkupar Nongtraw, an·tangni ka·dongchakenganiko parakataha.
Peter S Dkhar aro MHA-ni adviser (Northeast) AK Mishra-ko ku·baltitimgipana seokani bidingo Meghalaya sorkarini see u·iatanina uamang sengkuenga ineba HNLC bobil dolni general secretary parakataha.
Ku·baltimgiparangko grongena gita HNLC, dingtangmancha dilgipa saksako songaha aro ja·mano Hynniewtrep Peace Committee-ko songgen ineba Nongtraw parakataha.
Sorkari baksa agangrikanirang tom·tomao matchotna man·na gita ia committee-o mondolini dilgiparang, dingtang dingtang NGO-rang aro a·doko songdongenggipa manderangba bak ong·gen ineba HNLC-ni dilgipa parakataha.
HNLC-ni mande ine chanchichipe skatang manderangni kosako sinjete roaniko aro HNLC-ni manderangko rim·aniko dontongatchina gitaba HNLC-ni general secretary police department-ko didiataha.
