SHILLONG: Ri Bhoi a·jani Kyrdemkulai-o Central Agriculture University (CAU)-ko kulina gita a·dok sorkari, ma·mong sorkari baksa agangrikengkua ine Budbar salo, a·dokni Agriculture & Farmers’ Welfare Minister Banteidor Lyngdoh parakataha.
Assembly-o North Shillong-ni MLA Adelbert Nongrum-ni sing·anina aganchakaniko on·angengon, a·doko CAU-ko kulina gita a·dok sorkari, ma·mong sorkari baksa agangrikengkua aro mikkangchiba ua , a·dokni Chief Minister baksa iani bidingo agangrikangkugen ine Lyngdoh parakataha.
Agriculture Minister-ni parakatani gitade, a·doko CAU-ko kulina a·dok sorkarini proposal on·aniko niatna ma·mongni Agriculture Ministry-ba ku·rachakaniko on·aha.
Kyrdemkulai-o bregimin a·ako Central Agriculture University-na miksonge donjaengahani gimin ian a·dokko cha·bokengasama ine Nongrum-ni sing·skaon, da·o dipet iani bidingo sorkari agangrikkuengani gimin ‘cha·boka’ inede agansrangna man·kujawa ine Lyngdoh parakatskaaha.
“Meghalaya a·dokna CAU-ko nangchongmotenga aro chinga India sorkarioniko talbate ma·sie ra·na gita Chief Minister baksa nambate agangrikna jotton ka·gen,” ine ua aganaha.
Kyrdemkulai-o donggipa Agriculture college-o gipin a·dokni manderangnasa kamrangko on·enga aro joltangni manderangnade kamrangko on·jaenga ine ja·mano Mawsynram-ni MLA HM Shangpliang, iani bidingo a·dok sorkari ma·siengama ine sing·doangskaaha.
Ia sing·anina aganchakaniko on·angskaengon, ia college-ko Imphal-ni Central Agriculture University-sa chalaiengani gimin ua iani bidingo Chief Minister baksa agangrikjringenga ine Agriculture Minister parakataha.
