SHILLONG: Kamo ong·kuengmitingon politics-ni kamrango bak ra·paahani gimin PWD (Buildings)-ni Executive Engineer Ransom Sutnga-ni kosako ja·kuko de·china gita Bristibar salo, Rangsakona-ni AITC MLA Zenith Sangma didiangaha.
Assembly-ni budget session-o chanchirimaniko dakdilangengon, sorkarini kamko ka·enggipa manderang, politics-ni kamrango ba political dolrango bak ra·pana man·jawa ine Meghalaya Service (Conducts) Rules 2019-o niamrangko donmanahani gimin ia Executive Engineer-ni kamara ia niamko pe·ani gita ong·aha Zenith parakataha.
Adita salrangna skangsan, PWD (Buildings)-ni Executive Engineer ong·enggipa Ransom Sutnga-ko North Shillong constituency-ni NPP candidate ong·gen ine Rajya Sabha-ni MP aro NPP-ni state president WR Kharlukhi parakatahachim.
AITC MLA-ni dabianina aganchakaniko on·angskaengon, ia Executive Engineer-na sorkari, aganchakaniko on·china u·iataha aro Meghalaya Services (Conduct) Rules 2019-o pangchake ia officer-ni kosako nanga gita ja·kurangko de·anggen ine a·dokni Deputy Chief Minister Prestne Tynsong parakataha.
