TURA: South West Garo Hills a·jani Betasing jolrango automated teller machine (ATM)-rang dongkujaengani gimin ia jolni manderang, Ampati-onasa re·ange tangka paisarangko okna nangengani a·sel neng·nikanirangko chagrongna nangtokenga ine Garo Students Union (GSU) Western Zone (South) Ampati parakatenba, Betasing bazar-oba ATM damsako kulie on·china gita dabiangaha.
Iani bidingo Tura-o donggipa State Bank of India (SBI)-ni regional branch manager-na sedoatengon, Betasing jolrango ATM-rang dongkujani a·sel manderang, kilometre 8-10-mang ong·gipa ramako re·ange Ampati-o donggipa ATM-onikosa tangka paisarangko okna nangtokenga aro ian manderangna somoi aro koros bon·na nangani ong·enga ine GSU WZS Ampati-ni president Salman D Sangma parakataha.
“MGNREGS aro uandakgipa dingtang dingtang sorkarini scheme-ni tangka paisarangko okna gitaba manderang chel·a biaponasa re·ange tangka paisarangko okna nangenga aro iandakgipa tangka paisarangara manderang jinmani tangka paisarangsa ong·ani gimin pangnan tangka paisarang bang·rongaia aro iandake chel·a biaprangoniko oke ra·bana nanganiara namen kenchakna nanganiba ong·enga,” ine Sangma parakatenba, Betasing jolo songdongenggipa manderangni namgnina Betasing Bazar-o SBI-ni ATM booth damsako kulichina SBI-ni official-ko didiataha.
