SHILLONG: Meghalaya Board of School Education (MBOSE)-ni Secondary School Leaving Certificate (SSLC) porikkako Bristibar sal dipet a·bachengatangani ja·man Higher Secondary School Leaving Certificate (HSSLC) porikkakoba mijal Sukrobar sal dipet a·dokni dingtang dingtang centre-rango a·bachengataha.
Ia bilsio HSSLC porikkako a·dok gimikoni sak 23,064 chatro chatrirang seenga aro ia sak 23,064 chatro chatrirangoni sak 12,936-de me·chikrang aro sak 10,128-de me·asarang ong·a.
HSSLC porikkako seenggipa sak 23,064 chatro chatrirangoni sak 18,218-de regular, sak 1,536-de non-regular, sak 1,524-de private, sak 1,328-de compartmental aro sak 458 chatro chatrirangde improvement gadango porikkako seenga.
Meghalaya a·dok gimiko dam 105 HSSLC porikkako sechakgipa centre-rang donga aro ianoni dam 66-de Shillong region-o aro dam 39-de Tura region-o ong·enga.
