SHILLONG: 2013 bilsio South West Garo Hills a·jani Ampati police station-o abisa sakgniko drae til·ekgipa police officer Nurul Islam-ni bidingo POCSO-ni kachari hearing-ko dakangenba, uko dosi gnang ine parakataha aro una Sombar salo sastini raiko on·na tik ka·e donangaha.
Iani bidingo POCSO court-ni Public Prosecutor Evalarisha Rynjah, kobor ra·timgiparangna u·iatengon, dos dakgipa police officer-rangko dai gamatan baksana janggi tanga gimik pattoko donchina kachario mol·molangaha ine parakataha.
Dos dakgipa police officer Nurul Islam, POCSO Act 2012 aro IPC-ni ning·o kragija kamrangko ka·ahani gimin sastiko man·na kraa ine Bristibar salo POCSO court, ia police officer-ko dosi chanaha.
Dos dakgipa Nurul Islam, 2013 bilsini March 13 tariko aro March-ni 14 tarikoba ia abisa sakgnioni bilsi 14 ong·gipa me·chik bi·sako Ampati police station-o drae til·ekahachim. Ia apsan bilsini March 31 tarikoba ua, ia me·chikni bilsi 17 ong·gipa abitangko silchidare mesokenba drae til·ekahachim.
Ia a·sel ong·ani ja·mano abisa sakgnini pagipa, police officer-ni kosako FIR ka·doangahachim.
2013 bilsio abisa sakgniko drae til·ekgipa police officer-ko kachari dosi chana
Date:
Share post:
